Reyktur áll er eitt af aðalsmerkjum Sægreifans og þeim fjölgar stöðugt sem geta ekki hugsað sér aðventu- eða jólahlaðborð án þess að ál sé þar að finna.

Nú fer í hönd sá tími ársins þegar mest spurn er eftir þessari vöru og rétt að vekja athygli á því að nóg er til af reyktum ál í forðabúri Sægreifans.

Hægt er að fá fiskinn flakaðan á staðnum og tilbúinn til að bera á borð. Menn geta líka látið setja fiskflökin í gjafaumbúðir. Matgæðingar og sælkerar kunna afar vel að meta að fá reyktan sægreifaál að gjöf, það er margsannað!

Állinn er verkaður og reyktur á staðnum, í eina reykofni sinnar tegundar á Íslandi. Kjartan sægreifi keypti ofninn á sínum tíma og flutti inn frá Þýskalandi.

Fámennt verður en góðmennt (að vanda) í starfsliði Sægreifans laugardaginn 20. október vegna árshátíðar í fyrirtækinu. Starfsfólk fer úr bænum og gerir sér dagamun. Opið verður eins og venjulega um helgina en enga skötu verður að fá í laugardagshádeginu. Skötuvinir eru beðnir velvirðingar á þvi.

Siginn fiskur er kominn á ný á matseðilinn okkar í hádeginu á þriðjudögum og fimmtudögum og skata í hádeginu á laugardögum. (more…)

Elísabet Jean Skúladóttir og Daði Steinn Sigurðsson hafa keypt veitingahúsið Sægreifann af Kjartani Halldórssyni, hinum eina og sanna sægreifa. Frá þessu er greint á matar- og vínvefnum Freistingu, freisting.is.

(more…)

Ástralski stórleikarinn Russell Crowe mætti á Sægreifann í hádeginu í dag við þriðja mann og fékk sér gott í gogginn. Hann var á staðnum í um klukkustund og hafði hreint ekkert á móti því að sitja fyrir á mynd ásamt fríðum flokki stelpna úr starfsliði staðarins, eins og sést í frétt á dv.is. Þær voru heppnar að vera á vaktinni akkúrat í dag, stelpurnar!

Crowe er á Íslandi til að leika aðalhlutverk í kvikmynd um Örkina hans Nóa sem Paramount Pictures framleiðir. Myndin verður tekin upp í New York og á Íslandi – ekki samt á Sægreifanum að því best er vitað …

Davíð Ólafsson söngvari var í hópi fjölda gesta á Sægreifanum um sjómannadagshelgina og snæddi utan dyra, enda bauð veðrið aldeilis upp borðhald undir berum himni.

Hann þakkaði fyrir sig að máltíð lokinni með því að taka lagið fyrir Kjartan Sægreifa og aðrir gestir fengu að sjálfsögðu að njóta þessa óvænta og ókeypis „eftirréttar“!

Áheyrendur við næstu borð á pallinum utan dyra kunnu vel að meta sönginn og klöppu Davíð hressilega lof í lófa.

Gestkvæmt var á Sægreifanum alla sjómannadagshelgina, enda margir á ferli á hafnarsvæðinu í tilefni af Hátíð hafsins.

Ástæða er til að vekja athygli á því að siginn fiskur hefur verið tekinn af matseðli Sægreifans og verður ekki færður upp á disk þar aftur fyrr en í september. Signi fiskurinn er hins vegar seldur þeim sem vilja sjóða hann heima hjá sér. Óþarfi er því að þeir örvænti sem geta ekki hugsað sér að lifa sumarið til enda án þess að borða nokkurn þennan góða og þjóðlega mat.

Skata er heldur ekki í boði á Sægreifanum í sumar, nema menn panti hana fyrir fram. Hún er haust- og vetrarmatur á staðnum, líkt og signi fiskurinn, og skilar sér aftur á matseðilinn í haust.

Annelie hin þýska með kútinn sinn.

Hádegi á síðasta laugardegi marsmánaðar 2012 á Sægreifanum. Allt að gerast. Vor í lofti og Kjartan með skötu í potti að vanda, reyndar  í síðasta sinn í laugardagshádegi á þessum vetri. Vilji menn fá skötu í vor og sumar verður að panta fyrir fram. Í haust tekur Kjartan upp þráðinn að nýju og þá geta skötuunnendur gengið aftur að kæstu kræsingunum sínum vísum á ákveðnum tímum.

Margir fengu sér skötu, aðrir grillaðan fisk og enn aðrir humarsúpuna heimsfrægu, þar á meðal 15 manna hópur Frakka og Japana sem birtist og lagði undir sig langborð á efri hæð. Humarsúpa á línuna og allir glaðir.

Ragnar bóndi á Dalshöfða í Fljótshverfi eystra birtist og fékk sér í gogginn. Fanney, systir Kjartans sægreifa, mætti líka í skötuna. Úr varð fjölskyldufundur. Þau eru systkinabörn, Fanney, Kjartan og Ragnar. Svipmótið leynir sér ekki.

Höddi allsherjarreddari leit inn til að borða og redda og Jón Ólafsson, Skaftfellingur og fyrrverandi stjarna í hástökki, heilsaði upp á mannskapinn. Gleymum ekki Gunnari Í. Guðjónssyni sem málar myndverk og seldi helling eftir að Séð og heyrt lagði forðum undir hann tvær opnur. Hann hafði gert góð skókaup og kynnti fjárfestinguna þeim er hafa vildu.

Útlendir túristar voru í hrönnum á Sægreifanum og skipuðu sér á bekki í öllum þremur veitingasölunum. Við kassann beið blíðleg kona með ungabarn í fangi í röð til að borga. Hún skildi hrafl í íslensku og reyndi að tjá sig líka, með góðum árangri. Annelie er þýsk og var að koma hingað til lands í fyrsta sinn. Hún er einn margra Þjóðverja sem hafa fyllst áhuga á Íslandi, Íslendingum og íslensku. Hún hafði einfaldlega útvegað sér kennslugögn í íslensku og byrjað að læra! Svona fólk er gaman að hitta.

Laugardagshádegi á Sægreifanum. Þar er bæði mannlíf og matur eins og best gerist. Þar gerast hlutirnir. Aftur og aftur.

Sægreifinn er nú í fyrsta sinn með reyktan norðlenskan rauðmaga til sölu, lostæti sem unnendur gæðasjávarfangs ættu ekki að láta fram hjá   sér fara.

Rauðmaginn á uppruna að rekja til Ólafsfjarðar, keyptur af Gunnari Ágústssyni sjómanni og Guðfinnu Friðriksdóttur. Fiskurinn var síðan reyktur í Garðinum áður en Kjartan sægreifi fékk hann í hendur til að selja heilan eða niðursneiddan, allt eftir óskum viðskiptavinarins.

Kjartan var að sýsla með rauðmagann ólafsfirska baka til á Sægreifanum laugardaginn 10. mars og setja í öskjur til sölu. Þar var þá á næsta borði hópur hressra karla frá París yfir humarsúpunni heimsfrægu. Þeir fylgdust með af áhuga, enda Frakkar matmenn miklir og opnir fyrir nýjungum á fæðusviði. Frönsku túristarnir fengu rauðmaga að smakka og ljómuðu af ánægju allir sem einn. Þetta fannst þeim gott  á bragðið og spennandi líka. Það finnst líka fleirum og rétt að rauðmaganördar á suðvesturhorninu verði snarir í snúningum á meðan birgðir endast í kælikistum Sægreifans.

Afar gestkvæmt var á Sægreifanum á Þorláksmessu, eins og lög gera ráð fyrir.Við tókum daginn snemma til undirbúnings annasömustu klukkustundum ársins í rekstrinum og síðan tóku gestir að streyma að. Flestir fengu sér skötu, aðrir eitthvað annað. Stemningin var söm við sig í aðdraganda jóla.

Hér má sjá nokkrar myndir frá Þorláksmessu, bæði frá undirbúningnum að morgni  og frá síðan frá atinu þegar líða tók á daginn. Það segir sína sögu að þónokkrir gestir pöntuðu skötu á Þorláksmessu 2012 um leið og þeir gerðu upp fyrir máltíð dagsins!