Skata er heldur ekki í boði á Sægreifanum í sumar, nema menn panti hana fyrir fram. Hún er haust- og vetrarmatur á staðnum, líkt og signi fiskurinn, og skilar sér aftur á matseðilinn í haust.

Annelie hin þýska með kútinn sinn.

Hádegi á síðasta laugardegi marsmánaðar 2012 á Sægreifanum. Allt að gerast. Vor í lofti og Kjartan með skötu í potti að vanda, reyndar  í síðasta sinn í laugardagshádegi á þessum vetri. Vilji menn fá skötu í vor og sumar verður að panta fyrir fram. Í haust tekur Kjartan upp þráðinn að nýju og þá geta skötuunnendur gengið aftur að kæstu kræsingunum sínum vísum á ákveðnum tímum.

Margir fengu sér skötu, aðrir grillaðan fisk og enn aðrir humarsúpuna heimsfrægu, þar á meðal 15 manna hópur Frakka og Japana sem birtist og lagði undir sig langborð á efri hæð. Humarsúpa á línuna og allir glaðir.

Ragnar bóndi á Dalshöfða í Fljótshverfi eystra birtist og fékk sér í gogginn. Fanney, systir Kjartans sægreifa, mætti líka í skötuna. Úr varð fjölskyldufundur. Þau eru systkinabörn, Fanney, Kjartan og Ragnar. Svipmótið leynir sér ekki.

Höddi allsherjarreddari leit inn til að borða og redda og Jón Ólafsson, Skaftfellingur og fyrrverandi stjarna í hástökki, heilsaði upp á mannskapinn. Gleymum ekki Gunnari Í. Guðjónssyni sem málar myndverk og seldi helling eftir að Séð og heyrt lagði forðum undir hann tvær opnur. Hann hafði gert góð skókaup og kynnti fjárfestinguna þeim er hafa vildu.

Útlendir túristar voru í hrönnum á Sægreifanum og skipuðu sér á bekki í öllum þremur veitingasölunum. Við kassann beið blíðleg kona með ungabarn í fangi í röð til að borga. Hún skildi hrafl í íslensku og reyndi að tjá sig líka, með góðum árangri. Annelie er þýsk og var að koma hingað til lands í fyrsta sinn. Hún er einn margra Þjóðverja sem hafa fyllst áhuga á Íslandi, Íslendingum og íslensku. Hún hafði einfaldlega útvegað sér kennslugögn í íslensku og byrjað að læra! Svona fólk er gaman að hitta.

Laugardagshádegi á Sægreifanum. Þar er bæði mannlíf og matur eins og best gerist. Þar gerast hlutirnir. Aftur og aftur.

Rauðmaginn á uppruna að rekja til Ólafsfjarðar, keyptur af Gunnari Ágústssyni sjómanni og Guðfinnu Friðriksdóttur. Fiskurinn var síðan reyktur í Garðinum áður en Kjartan sægreifi fékk hann í hendur til að selja heilan eða niðursneiddan, allt eftir óskum viðskiptavinarins.

Kjartan var að sýsla með rauðmagann ólafsfirska baka til á Sægreifanum laugardaginn 10. mars og setja í öskjur til sölu. Þar var þá á næsta borði hópur hressra karla frá París yfir humarsúpunni heimsfrægu. Þeir fylgdust með af áhuga, enda Frakkar matmenn miklir og opnir fyrir nýjungum á fæðusviði. Frönsku túristarnir fengu rauðmaga að smakka og ljómuðu af ánægju allir sem einn. Þetta fannst þeim gott  á bragðið og spennandi líka. Það finnst líka fleirum og rétt að rauðmaganördar á suðvesturhorninu verði snarir í snúningum á meðan birgðir endast í kælikistum Sægreifans.

Hér má sjá nokkrar myndir frá Þorláksmessu, bæði frá undirbúningnum að morgni  og frá síðan frá atinu þegar líða tók á daginn. Það segir sína sögu að þónokkrir gestir pöntuðu skötu á Þorláksmessu 2012 um leið og þeir gerðu upp fyrir máltíð dagsins!

Dæmi eru samt um að gamla góða leiðin sé farin til að láta frá sér heyra. Þannig barst jólakort inn um lúguna á aðventunni. Það var frá viðskiptavini okkar frá Dusseldorf í Þýskalandi. Sá kom síðastliðið sumar og nefnir sérstaklega að hér hafi fengið besta fiskinn og bestu humarsúpuna á ævinni.

Það yljar í kuldanum að menn leggi á sig að skrifa og senda slíkar kveðjur.

Við sendum viðskiptavinum okkar fjær og nær bestu nýárskveðjur með þökk fyrir hið liðna!

Skata verður nú í boði alla daga til jóla frá hádegi til kvölds. Þetta ættu skötuunnendur ekki að láta fram hjá sér fara, einkum og sér í lagi þeir sem verða erlendis á Þorláksmessu og missa af Þorláksmessuskötunni. Þeir geta bætt sér skaðann með því að koma á Sægreifann þegar þeim hentar áður en þeir fara úr landi og borða skötu eins og þeir geta í sig látið! Máltíðin kostar 1.950 krónur og fullvíst má telja að það sé ódýrasta skötuveislan í veitingahúsi á höfuðborgarsvæðinu og þó víðar væri leita.

Áríðandi er að þeir, sem vilja skötu á Sægreifanum á Þorláksmessu, panti borð til að komast örugglega að. Svo mikil er eftirspurnin að færri næla sér í öruggt sæti en vilja. Eins gott að láta vita strax af sér í síma 553 1500 til að lenda ekki í skötukettinum. 

Myndin sem fylgir með var tekin í hádeginu 10. desember 2011 af Kjartani sægreifa Halldórssyni í vinkvennahópi. Þessar konur eiga það sameiginlegt að hafa kynnst á blogginu og þær áttu góða stund saman á Sægreifanum. Sumar fengu sér skötu, aðrar eitthvað annað. Aðalatriðið er að styrkja vináttuböndin og hvar er betra að gera slíkt ein einmitt á Sægreifanum?

• Myndband á YouTube af Kjartani sægreifa að afgreiða skötu til laugardagsgesta.

Þorvaldur er ættaður úr Jökulsárhlíðinni eystra og tróð fyrst upp með nikkuna á balli þar aðeins níu ára gamall, þegar sá sem lék fyrir dansi örmagnaðist og gat ekki meira!

Hann hefur samið  fjölda laga og gefið út á diskum sem óhætt er að mæla með. Á disknum Okkar útrás trommar afabarnið Aron Daði Hauksson með Þorvaldi og á disknum Vetrarrómantík syngur annað afabarn, Tara Sif Þrastardóttir, jólalög, sum eftir Þorvald en önnur klassísk.

Umsvifin voru þannig merkjanlega minni hjá okkur í júní en í sama mánuð í fyrra. Hins vegar  var mjög mikið að gera allan júlímánuð, meira en í sama mánuði í fyrra, og sömu sögu er að segja af ágústmánuði. Erlendu ferðamennirnir streyma að og við sjáum líka greinilega fjölgun Íslendinga í viðskiptavinahópnum.

Athvarf útgerða báta til hvalaskoðunar á Faxaflóa er í nokkurra metra fjarlægð frá Sægreifanum og á sömu slóðum liggja veiðiskip Hvals hf. við bryggju. Fjöldinn allur af ferðamönnum kemur á Sægreifann að hvalaskoðun lokinni til að fá sér að borða og hvað skyldi margir þeirra biðja um? Hrefnukjöt! Og merkilegt er það að þrefalt meira hrefnukjöt hefur verið selt hjá okkur sumarið 2011 en á sama tíma í fyrra. Útlendir túristar eru stærsti kúnnahópurinn í þeim efnum en við skynjum líka vaxandi áhuga Íslendinga fyrir þessu góða kjöti til grillunar.

Almennt séð tökum við svo sérstaklega eftir því hve margt ungt fólk kemur hingað í fyrsta sinn til að fá sér að borða og birtist jafnvel aftur nokkrum dögum síðar.

Eftirtektarvert er líka að við fáum starfsmenn af vinnustöðum í nágrenninu oftar í hádegismat en áður, sem sýnir jafnframt að sjálft svæðið hefur breyst. Hér eru einfaldlega fleiri vinnustaðir alveg á næstu grösum og umhverfið allt er líflegra en áður.

Ýmsir spyrja sem svo hvort fleiri veitingastaðir í næsta nágrenni séu ekki slæm tíðindi fyrir Sægreifann vegna aukinnar samkeppni um viðskiptavini?

Nei, við lítum ekki svo á heldur þvert á móti!

Sægreifinn hefur sína sérstöðu og hún verður bara enn skýrari þegarfólk stendur frammi fyrir fleiri veitingakostum á þessu svæði miðborgarinnar. Við högnumst á því að reka veitingahús sem er ekkert venjulegt. Því fleiri sem af okkur vita, því betra.

Reykjavíkurhöfn hefur í heild sótt í sig veðrið sem vettvangur fjölbreyttrar atvinnustarfsemi og mannlífs. Við erum hluti af þeirri heild, fastur punktur í tilverunni og sögunni.

Alls voru 50 myndir gefnar út af þessu tilefni og Kjartan sægreifi Halldórsson á þær allar. Aftan á hverri mynd eru prentaðar upplýsingar um viðkomandi skip, útgerð þess og útgerðarstað.

Myndirnar eru að sjálfsögðu sögulegur fjársjóður og til gamans og ánægju höfum við látið skanna þær og setja á Vefinn ásamt upplýsingum á bakhliðum þeirra.

• Krækja á Eimskipamyndirnar er hér.